“Allegri, a do të jetë ende trajner? Sigurisht, sipas kontratës, duhet të vazhdojë. Javën e kaluar isha larg Torinos, u ktheva dhe pata mundësinë ta ndiqja ekipin. E pashë Allegrin shumë të qetë, shoh edhe presidentin që kalon pothuajse çdo ditë nga stërvitja e skuadrës, kështu që nuk konstatoj ndonjë gjë që nuk shkon. Megjithatë, të gjithë do të takohemi e të diskutojmë për të ardhmen, kur të vijë koha”. Kështu u shpreh për mikrofonin e “Sky Sport” zv.presidenti i Juventusit, Pavel Nedved, lidhur me të ardhmen e trajnerit bardhezi.
Vetë trajneri livornez nuk foli për këtë gjë, pas barazimit 1-1 ne derbin me Torinon, por përgëzoi lojtarët që drejton: “Do të kishte qenë një humbje e pamerituar, kemi gabuar disa pasime në 20 metrat e fundit, më pas ata nuk kanë gjuajtur më në portë. Goli i tyre ishte një dhuratë e jona. Duhet t’u bëj komplimente lojtarëve të mi, sepse kanë dhënë gjithmonë maksimumin, edhe pasi kemi siguruar titullin. Ndeshje të rëndësishme na presin dhe ne duam ta tregojmë veten“.
