Një ngjarje e rëndë është regjistruar në Irlandë, ku tre të rinj kanë rënë viktima të një sulmi me acid. Ndër to ka qenë edhe 17-vjeçari Tega Agberhiere, një futbollist i regjistruar në skuadrën e Waterford FC nën 17 vjeç dhe i provuar tek Crystal Palace dhe Tottenham.
Si pasojë e acidit të hedhur në fytyrë, Agherhiere ka pësuar dëmtime në lëkurë, por më shqetësues ka qenë humbja e shikimit për të riun, i cili ka filluar të rikuperojë pamjen e tij që pas sulmit, të ndodhur me 25 prill.
Aktualisht 17-vjeçari po qëndron në një spital në qytetin e tij, teksa shikimi vijon te jetë tërësisht i turbull në të dy sytë. Gjithsesi mjekët kanë dhënë shpresë se me kalimin e kohës shikimi i tij do të qartësohet.
“Isha 100% i bindur se nuk do të shihja kurrë”, tha adoleshenti për ndjenjat rreth sulmit ndaj tij.
Policia ka shoqëruar në komisariat katër të rinj, mirëpo të gjithë u liruan pa asnjë akuzë, sepse autorët e vërtetë të sulmit nuk janë zbuluar ende.
