Duke nisur nga sezoni i ardhshëm, një tjetër futbollist shqiptar do të luajë në elitën e futbollit kroat.
Arbër Mehmetllari ka firmosur për katër vite me Lokomotivën e Zagrebit.
Pasi u shpall golashënuesi më i mirë i ekipit U-19 të Lokomotivës së Zagrebit me 13 gola, 8 në kampionat dhe 5 në kupë, lojtari i lindur në vitin 2000 firmosi kontratën profesioniste me bardheblutë deri në vitin 2024.
Mehmetllari do të jetë pjesë e ekipit kroat në fazën përgatitore. Ai i bashkohet Myrto Uzinit dhe Jon Mersinajt, futbollistët e tjerë shqiptarë në pronësi të Lokomotivës së Zagrebit.
Mehmetllari, i cili është një prodhim i Akademisë së Futbollit, ka qenë edhe pjesë e Shqipërisë U-19 kur kjo grupmoshë drejtohej nga Erjon Bogdani.
Në sezonin e ri do të shohim tre shqiptarë si pjesë e skuadrës kroate.
