Kush është trajneri që do të luajë sot finalen e madhe të Ligës së Kampionëve, si i ka raportet me lojtarët dhe çfarë fshihet pas njeriut të akullt?
Lotët me Ajaksin nuk e ndryshojnë dot të shkuarën e tij dhe “DailyMail” analizon në disa pika trajnerin Mauricio Poçetino.
NUHATJA TAKTIKE– Këtë sezon ka luajtur me 3 ose me katër mbrojtës dhe mesfusha si romb ka qenë zgjedhja e duhur për të skicuar formacionin ideal edhe prej mungesave dhe dëmtimeve të shumta. Poçetino beson se futbolli udhëhiqet nga energji të tjera. Stërvitja e tij kalon përtej taktikave dhe përtej besimit kolektiv. I pëlqen ta zotërojë topin, ta kontrollojë topin. Nuk ka frikë nga ndryshimi i skemave në mes të lojës nëse sheh se ekipi nuk po funksionon ashtu siç duhet, megjithëse këtë sezon zgjedhjet i ka pasur të limituara.
TEMPERAMENTI– Emocionalisht e kontrollon veten, edhe pse lotët në “Amsterdam” mund të tregojnë të kundërtën. Megjithatë, Poçetino nuk shpërthen kurrë në tërbim. Është i qetë dhe i sigurt te skuadra e tij. Në bisedat private me lojtarët është më i drejtpërdrejtë dhe kërkon që futbollistët të jenë gjithmonë pjesë e grupit dhe të punojnë me metodat e tij. E bëri me Kapue, Kabul, Paulinjon dhe Adebajorin. Ekuilibri është shumë i rëndësishëm për të në skuadër.
EKSPERIENCA– I irrituar nga referimet e vazhdueshme për faktin se ai kurrë nuk ka fituar një trofe si trajner, edhe pse ai kundërpërgjigjet me Kupën e Katalonjës kundër Barcelonës. Por është e vërtetë, Poçetino nuk ka asnjë kupë në palmaresin e tij. Nuk mund të krahasohet me trajnerë si Pep Guardiola, Karlo Ançeloti apo Zhoze Murinjo. Kjo është finalja e tij e parë europiane, por si lojtar ka kujtime të bukura në këtë kompeticion. Me Totenhemin ka bërë një rrugëtim të jashtëzakonshëm duke e kualifikuar 3 vite radhazi në Champions.
KARAKTERI– Njerëzit e vlerësojnë atë për arsyet e lartpërmendura. Poçetino është para së gjithash një person i vërtetë. Ai vlerëson miqësinë dhe vlerat njerëzore. I pëlqen të shtrëngojë duart, të buzëqeshë dhe të angazhonte. Është besnik ndaj stafit të tij dhe kërkon gjithmonë përmirësime për kontratat e tyre. Është popullor me trajnerët e tjerë dhe ka raport të mirë me ta. Tifozët e Totenhemit e adhurojnë për atë që ka bërë.
STILI– Pas Zhoze Murinjos dhe Arsen Vengerit, mund të jetë trajneri i radhës me deklarata të forta në konferencë. Fjalët e tij janë goditëse dhe mesazhet e qarta. Ai është i gatshëm që t’i trajtojë të gjitha çështjet dhe nuk ka frikë nga opinionet. Anglishtja e tij mund të jetë e luhatur, por konferencat e tij për shtyp janë interesante për t’u dëgjuar.
MARRËDHËNIE ME LOJTARËT– Raporti është aq miqësor, saqë dikush që e prish këtë, mund të largohet. Shikoni rastin e Uokerit. Lojtarët duhet t’u binden metodave të tij, ose në të kundërt nuk do të funksionojë. Kujtojmë që menaxhoi në mënyrë perfekte Lorisin dhe Aldervaireldin.
