Mendoj se jam në një moment të karrierës sime ku unë dua të provoj diçka të re. Kam respektin më të madh për gjithçka ka ndodhur tek Tottenham, por unë e kam thënë se do më pëlqente të provoj diçka të re”!
Ishte kjo deklarata e Christian Eriksen për median daneze “Ekstra Bladet”, që ka ndezur jo vetëm shpresat e ekipeve të joshura prej danezit, por njëherësh ka aktivizuar edhe lëvizjet e drejtuesve të Tottenham.
Me kontratën që skadon në 2020, sinjalin e dhënë nga vetë mesfushori dhe të gjithë gjigantët e europës në garë për shërbimet e danezit, Tottenham ka nxituar të vendosë etiketën e çmimit mbi gurin e çmuar të “Spurs”. Sipas raportimeve të “The Times”, klubi londinez e ka vlerësuar mesfushorin Eriksen plot 100 milionë sterlina, rreth 113 milionë euro.