Sulmuesi i Kombëtares, Armando Sadiku, foli në prag të sfidës ndaj Moldavisë, që do të zhvillohet ditën e martë në “Elbasan Arena”.
28-vjeçari u shpreh se skuadra ndihet shumë mirë me skemën e aplikuar nga trajneri Reja, pavarësisht rezultatit në ndeshjen ndaj Islandës.
Në fund bomberi elbasanas zbuloi se do të kthehet te Levante, pas aventurës në Zvicër me Luganon.
SKEMA- “Kur luan vetëm, duhet të jesh i përqendruar 120%. Kur luan me 2 sulmues mund të kesh shumë raste. Ndihem shumë mirë me 2 sulmues. Është shumë mirë kjo skemë”.
MESFUSHORËT– “Sulmuesit nuk morën shumë topa nga mesfusha. Në Islandë frynte shumë erë. Topi donte një precizion, për të dalë para portierit. Na mungoi pasimi i fundit. Edhe kur fola me trajnerin, më tha të njëjtën gjë”.
SKEMA 4-3-3 – “Deri në ditën e sotme, nuk e ka aplikuar këtë skemë. Është përqendruar vetëm te skema që luajtëm kundër Islandës”.
E ARDHMJA – “Do kthehem te Levante. Kam kontratë 1+1. Kam programin, do filloj fazën përgatitore. Jam i kënaqur sepse drejtuesit e Levantes më kanë qëndruar pranë. Më kanë ndjekur çdo ndeshje te Lugano. Shpresoj të jap më të mirën time, ta filloj atje ku e lashë para dëmtimit”.
