Juventus josh, Juventus tërheq. Rabio dhe De Ligt janë indikatorët e forcës së madhe gravitacionale që tregon se Juventusi është ajo që po drejton të gjithë vorbullën e merkatos.
Kush mbërrin në Torino bën një zgjedhje të qartë dhe të vullnetshme, pasi jo më kot në dekadën e fundit ata kanë thithur me një forcë të frikshme magnetike talente nga e gjithë Europa. Nga historia e pushtetit ekonomik e deri te grupi i fortë i lojtarëve që kanë ditur të afrojnë, tashmë është e thjeshtë të thuhet se bardhezinjtë pëlqehen dhe joshin këdo, me tratativa që janë më shumë sesa serioze.
KOMPETITIVË – Të qenit mes 8 më të mirave të Europës në katër nga pesë sezonet e fundit, siç kishte kërkuar presidenti Anjeli, pas humbjes me Ajaksin, është pa dyshim një faktor i fortë.
Është e vërtetë që vit pas viti tentohet që të rritet sa më shumë niveli, por ndonëse zhgënjimet nuk kanë munguar, si në sezonin e kaluar, grupi i lojtarëve mbetet gjithsesi i nivelit të lartë, me shumë futbollistë që janë gati të shpresojnë se kura “Sarri” do të jetë ajo e duhura për të mbërritur te ajo “mollë e ndaluar” prej 23 vitesh, që quhet… Champions.
ÇËSHTJE EKONOMIKE – Tashmë, dihet nga të gjithë, Juventusi me manovrat e saj në marketing dhe investime të tjera siç ishte, për shembull, stadiumi privat, ka ditur që të ngjitet brenda pak viteve në elitën e klubeve më të pushtetshme dhe të forta ekonomikisht, duke prekur dhe kaluar 500 milionë eurot arkëtime në vit.
Këtë e konfirmon më së miri dopiogoditja e bërë në tri vite, Higuain-Ronaldo, ku nuk bëjnë përshtypje vetëm pagesat prej 90 dhe 117 milionë eurosh, por edhe pagat e niveleve shumë të larta, respektivisht 7.5 dhe 31 milionë euro neto në sezon. Dhe sigurisht, që me futbollin e sotëm që është jo vetëm sport, por edhe parà dhe marketing, Juventusi nuk ka pse të ketë zili askënd.
FAKTORI RONALDO – Një magnet shumë i fortë dhe ndoshta më i rëndësishmi për të thithur talentet e të gjithë botës, është pa dyshim edhe faktori “Kristiano Ronaldo”. Fakti që CR7 pranoi të linte Realin e Madridit për Juventusin, tregon se po flasim për një klub madhështor, pasi një si Ronaldo nuk garanton vetëm sukses e prestigj, por di edhe të joshë, siç ndodhi me rastin De Ligt, ku mjaftoi ftesa e portugezit për të hedhur në erë bisedimet që dukeshin të mbyllura mes mbrojtësit holandez dhe Barcelonës, apo qoftë edhe PSG-së.
Për më shumë, me një si Ronaldo në skuadër, Champions-i nuk është një ëndërr, por një objektiv normal si gjithë të tjerët që mund të synojë Juvja.
SHARMI HISTORIK – Por, kundrejt të gjithë faktorëve të mësipërm, Juventusi ka edhe sharm, ka një histori të frikshme. Ndoshta, mund të kishte pasur disa kupa me veshë të mëdhenj më shumë në muzeun e tyre, por edhe pse numërojnë dy Champions, në finalen e këtij turneu kanë shkuar 9 herë, ndonëse në 7 raste janë munduar, në dy-tre prej të cilave ndoshta pikërisht si rrjedhojë e një vetëkënaqësie dhe sigurie të tepruar se mund ta fitonin lehtë finalen. Gjithsesi, futbolli e pranon edhe këtë, ndonëse sido që të jetë, fjala “Juventus” reflekton një emër dhe një klub të madh!
