Planet e merkatos interiste janë “miratuar” prej kohësh. Duke përjashtuar shitje të papritura apo shkëmbime të favorshme, strategjia e akorduar mes Antonio Kontes, drejtorit sportiv Auzilio dhe administratorit të deleguar Xhuzepe Marota parashikon 4-5 blerje. Një e pestë do nevojitet në rast largimi të Mauro Ikardit.
GATI PËR GRUMBULLIMIN – Pasi siguroi trajnerin me një sakrificë të madhe ekonomike, do veprojë po në të njëjtën mënyrë me skuadrën. “Suning” i ka garantuar Kontes një buxhet prej 120 milionë eurosh për merkaton. Trajneri kërkon një skuadër konkurruese dhe sa më të kompletuar në prag të angazhimeve verore, pra që nga momenti i grumbullimit të skuadrës në Lugano në datat 8- 14 korrik.
EMRAT – Falë transferimit me parametër zero të Diego Godinit, nuk do ndërhyhet në mbrojtje. Për repartet e tjera emrat janë pikasur prej kohësh. Në sulm, siç dihet, objektivat janë Edin Xheko dhe Romelu Lukaku. Boshnjaku mund të jetë blerja e parë, për 10-12 milionë euro plus një talent si shkëmbim. Ndërsa për belgun nevojiten 80 milionë.
Në mesfushë kandidati i vetëm është Nikolo Barela. Mesfushori është i bindur nga projekti zikaltër, por mbetet një distancë mes kërkesës dhe ofertës. Kaljari kërkon 50 milionë,
Interi së fundmi ka ofruar 36 plus 4 si bonuse lehtësisht të arritshëm dhe 10 të tjerë në rast fitoreje të titullit apo Champions-it. Në krahun e djathtë po ndiqet Valentino Lazaro i Hertës së Berlinit. Gjermanët duan 20 milionë, zikaltrit po këmbëngulin për 17. Këto janë përparësitë, kur të jenë plotësuar do tentohet edhe një rezervë për Marselo Brozoviç.
