Pas disfatës së pësuar kundër Islandës, Shqipëria është rikthyer tek rezultati pozitiv duke marrë një tre pikësh të artë në takimin e zhvilluar sot në Elbasan Arena kundër Moldavisë.
Të besuarit e trajnerit, Edi Reja, triumfuan me rezultatin e paster 2-0 përballë modestëve të Moldavisë, në një takim që u dominua totalisht nga kuqezinjtë.
Golin e parë në këtë takim e shënoi sulmuesi kavajas, Sokol Cikalleshi, që realizoi në minutën e 66-të pas një aksioni perfekt të nisur nga mesfushori Odise Roshi.
Një gol që shpërtheu në festë tifozerinë kuqezi në stadiumin e Elbasnit, po ashtu edhe trajnerin Italian Edi Reja, i cili arrin që të marrë fitoren e parë në stolin e përfaqësueses së Shqipërisë.
Ndërkohë që ndeshja po shkonte drejt fundit, Ylber Ramadani shënoi dhe golin e dytë dhe të parin me fanellën e kombëtare, duke e festuar në mënyrën më të mirë të mundshme.
Një fitore që i jep pak frymarrje Shqipërisë pas rezultateve negative dhe lojës së dobët që ka zhvilluar në takimet e fundit.
Pas kësaj fitoreje Shqipëria ngjitet në vendin e katërt në tabelën e renditjes me gjashtë pikë të grumbulluara.
Ndeshja e radhës për Shqipërinë do të jetë kundër Francës më datë 7 shtator, në vendin tonë.
Goli i shënuar nga Sokol Cikalleshi
Goli i shënuar nga Ramadani
