Skuadra e Tottenhamit me në krye trajnerin Mauricio Pochettino arritën këtë sezon deri në finalen e Ligës së Kampionëve.
Edhe pse pësuan disfatë përballë Liverpoolit, sërish sezoni i fundit për londinezët nuk mund të quhet dështim, duke llogaritur se klubi nuk shpenzonte në afrimin e lojtarëve në merkato prej një viti e gjysmë.
Në fakt, ngjason më shumë si një akt heroik i trajnerit argjentinas, pasi në shumicën e rasteve sapo hapet dritarja e transferimeve, teknikët nxitojnë të bëjnë riparime në merkato.
Megjithatë, duket se tashmë klubi i Tottenhamit i ka dhënë fund thatësirës së transferimeve dhe së shpejti do të zyrtarizojë nënshkrimin me anësorin 18-vjeçar, Jack Clarke.
Lojtari ka udhëtuar drejt Londrës për të kryer vizitat mjekësore, ndërsa në arkat e klubit të Leeds United, i cili kishte pronësinë e kartonit të Clarke, do të shkojnë 10 milionë paund.
Në sezonin e shkuar talenti ka impresionuar, duke regjistruar 25 paraqitje, ndërsa tashmë Clarke do të bëjë pjesë në radhët e nënkampionëve të Europës.