Pas vetëm 1 viti, Milan dhe Juventus mund të bien në ujdi për një tjetër transferim i cili i ngjan shumë historisë së Mattia Caldaras, që nga Atalanta u ble nga “Zonja” për 25 mln euro, ndërsa u shit te Milani për 40 mln euro, si pjesë e marrëveshjes për transferimin e Bonuçit në Torino (u vlerësuan të dy me këtë shifër).
Caldara luajti shumë pak me kuqezinjtë dhe dëmtimi i mbajti jashtë gjithë sezonin. Sakaq, historia rikthehet dhe tani “në tavë” është Merih Demiral, mbrojtësi i kombëtares së Turqisë, që u ble për 18 mln euro nga Sassuolo.
Por, bardhezinjtë, që duan ta mbajnë, i kanë vendosur Milanit një barrierë: 40 mln euro vlen turku.
Kuqezinjtë po kërkojnë mbrojtës dhe ato para nuk duan t’i japin, por bardhezinjtë kanë dhënë edhe formulën tjetër: huazim me të drejtë blerje, por edhe riblerje nga Juventusi. Mialni nuk është dakord për momentin, por nuk dihet nëse do të pranojë më vonë.
Sakaq, me transferimin e De Ligt, Juventusi ka pesë mbrojtës qendre, që janë shumë: Chiellini, De Ligt, Bonuçi, Rugani dhe Demiral.
Sassuolo, ndërkohë, ka akord me Juven që në dy vitet e ardhshme duhet lajmëruar në rast shitje të mbrojtësit, për të pasur mundësi barazimi oferte ose jo.
