Klubi i Vllaznisë ka prezantuar sot afrimin më të ri në skuadër, mbrojtësin 26-vjeçar nga Maqedonia e Veriut, Filip Gligorov, i cili vjen nga skuadra rumune e Dunarea Kalarasi, ku ka luajtur sezonin e fundit.
Gligorov është rritur te të rinjtë e Rabotnickit, teksa përveç kësaj skuadre, ka luajtur edhe me ekipe të tjera maqedonase, si Shkupi, Sileksi, etj., ndërsa ka edhe një eksperiencë në Bosnjë me Olimpik Sarajevo.
Futbollisti është përzgjedhur nga trajneri Mirsad Jonuz dhe ka nënshkruar një kontratë një vjeçare me klubin shkodran, me opsion zgjatjeje nëse skuadra siguron pjesëmarrjen në kupat e Europës.
Përveç mbrojtësit Gligorov, klubi kuqeblu ka arritur marrëveshjen edhe me mesfushorin Behar Ramadani, i cili ka dalë të stërvitet nën urdhrat e Mirsad Jonuz, ndërsa në fillim të javës pritet të firmosë kontratën me shkodranët.
