Cristiano Ronaldo ditën e djeshme u nderua me çmimin prestigjioz “Marca Legend” për karrierën e tij të suksesshme si futbollist profesionist.
Çmimi iu dha nga drejtori i të përditshmes spanjolle, Juan Ignacio Gallardo, ndërsa ceremonia u zhvillua në teatrin ‘Reina Victoria’ në Madrid, ku mori pjesë edhe presidenti i Real Madridit, Florentino Perez.
Ylli portugez më pas foli pothuajse për gjithçka, madje edhe kur u pyet për ish-rivalët e tij Barcelonën, ai dha një përgjigje interesante.
“Si çdo vit e shoh përsëri shumë të fortë Barcelonën. Janë përforcuar shumë me De Jong, Griezmann, si vitin e kaluar me Coutinho, Dembele”.
“Ata janë gjithmonë një nga skuadrat më të mira në botë. Njësoj si Real Madridi, që janë përforcuar me Hazard, Jovic, Mendy. Jam i vetëdijshëm për Realin sepse kam lënë një trashëgimi këtu, kam lënë miq, është klubi me të cilin kam fituar më shumë gjëra dhe jam i sigurt njëqind për qind që do të bëjnë një sezon të shkëlqyeshëm”, përfundoi 34-vjeçari.
