Mauro Ikardi është një nga emrat më të nxehtë këtë merkato, teksa i është bërë e ditur se nuk është në planet e trajnerit për sezonin e ri.
Ish kapiteni zikaltër është duke u stërvitur i vetëm tani, pasi Konte vendosi të mos e marrë me skuadrën, që po zhvillon përgatitjet parasezonale në Azi. Sipas disa lajmeve thuhet se Ikardi ka hedhur poshtë ofertat e Napolit dhe disa klubeve të tjera, sepse ai është i bindur se Konte mund të ndryshojë mendje, dhe ta marrë përsëri në skuadrën e tij në sezonin e ardhshëm.
Për këtë ka folur edhe vete presidenti i Interit i cili u shpreh: “Ikardi është një lojtar i madh, një njeri i mirë, dhe ai e ndihmoi klubin me golat e tij në të kaluarën. Ne jemi të sigurtë se do të gjejmë një zgjidhje të mirë për të. Nuk do të ketë asnjë ndryshim mendimi, edhe pse tani nuk kemi shumë sulmues.”, u shpreh Zhang.
Juventusi dhe Napoli janë pretendentët kryesorë për të nënshkruar me sulmuesin argjentinas, edhe pse çmimi prej 70 milionë euro që kërkon Interi, duket i lartë.