E vërtetë, Juventusi e ka të lirë numrin 9 në fanellat e këtij sezoni, dhe Mauro Ikardi është favorit për ta mbajtur veshur. Por, nga ana tjetër, edhe Napoli nuk dorëzohet për shërbimet argjentinasit.
Klubi napolitan është gati të heqë dorë nga “pronari” i numrit 9-të, Simone Verdi. Kështu, 1-1 mes Juves e Napolit në distancë, dhe “topi” rinis sërish nga qendra.Siç shkruan “Corriere dello Sport”, Mauro Ikardi tani po e mendon seriozisht propozimin e presidentit De Laurentis që të bashkohet me Napolin, dhe nuk e sheh më si ekip inferior ndaj “Zonjës”. Këtë javë, flitet se vetë Ançeloti do të ketë një takim me Ikardin.
Nga ana tjetër, edhe vetë Vanda Nara, gruaja-agjente e Ikardit, kërkon të largohet sa më shumë nga Milano, ndoshta tani edhe drejt Napolit. Vetëm ditën e fundit, ajo ka postuar në Instagram, disa foto të sajat personale, por që në fakt ajo që vihet re, janë sytë që i ka lyer me një blu të ndezur, njësoj si ngjyrat e Napolit. Të jetë koincidencë, apo një shenjë për afrim me ekipin e Ançelotit?
