Lokomotiva e Zagrebit duket e fiksuar me futbollistët me origjinë shqiptare, dhe duket se beson shumë tek talenti i tyre.
Pas Eros Grezdës që shkëlqeu tek ekipi kroat, e së fundmi edhe Myrto Uzuni e Lirim Kastrati, si edhe disa të tjerë tek ekipet aktuale të moshave, Lokomotiva kërkon sërish prurje të reja shqiptare.
Nëpërmjet një njoftimi zyrtar, klubi shkruan: “Jemi krenarë të njoftojmë se nga data 15 korrik, deri më 20 korrik, NK Lokomotiva do të organizojë një kamp për fëmijët e lindur nga viti 2001-2005, në Gjakovë të Kosovës, ku priten të zgjidhen rreth 60 fëmijët më të talentuar.”
Në këtë kamp, do të jetë edhe Besnik Prenga, i cili është edhe skauti kryesor i Lokomotivës për Shqipërinë. Më të talentuarit do të marrin një ftesë edhe për kampin dimëror të Lokomotivës në Zagreb, për të parë më pas paraqitjen e tyre.
