Mbrojtësi i Kombëtares, Kastriot Dermaku, bëri një hap tepër të rëndësishëm në karrierën e tij, duke u transferuar te Parma në Serinë A nga radhët e Kozencës. Në një prononcim për “forcaparma.it”, 27-vjeçari flet për aventurën e tij të re duke u shprehur:
“Unë vij këtu me entuziazëm të madh për të treguar se kam ardhur në këtë kategori për të qëndruar. Aspekti fizik është pika ime e fortë. Kam shumë për të mësuar, këtu ka lojtarë më të vjetër se unë. Vij me modesti të madhe, i gatshëm për të mësuar të gjitha sekretet e Serie A.
Ofertat në merkato- Kishte disa kontakte, por sapo dëgjova për Parmën, menjëherë mendova se ishte zgjidhja më e mirë për mua.
Grupi- Në futboll çdo sezon duhet ta fillosh nga zero dhe të rinisesh. E rëndësishme është të kemi një grup solid dhe një mentalitet gjithmonë pozitiv, duke punuar gjithmonë maksimalisht. Rezultatet janë pasojë e kësaj dhe do të vijnë. Jam shumë i lumtur që jam këtu. Seria A ka qenë gjithmonë ëndrra ime dhe e shumë lojtarëve.
Bruno Alvesh- Ai është një profesionist i madh. Ka luajtur në Kupën e Botës, Kampionatin Europian dhe Ligën e Kampionëve. Është një pikë referimi, por jam i bindur se të gjithë të tjerët do më japin një dorë të madhe për t’u përshtatur dhe për të dhënë më të mirën e mundshme.
