Më 24 korrik 2020 do të nisin Lojërat Olimpike “Tokio 2020”, eventi më i rëndësishëm sportiv i vitit të ardhshëm. Një vit nga fillimi i Olimpiadës, organizatorët kanë zbuluar për publikun medaljet që do të vihen në qafën e sportistëve fitues.
Të gjitha medaljet që do të jepen, si në Lojërat Olimpike ashtu dhe ato Paraolimpike, janë me material të ricikluar. Kryesisht, shumica e materialeve të përdorura për to kanë ardhur nga pajisjet elektronike (celularë, televizorë etj).
Medaljet janë dizenjuar nga Junichi Kawanishi dhe ato janë prezantuar sot në Tokio, gjatë një konferencë për shtyp. Për të përgatitur medaljet janë përdorur 30.3 kilogramë ar, 4.100 kilogramë argjend dhe 2.700 kilogramë bronz.
