Bajerni i Mynihut nuk e nisi me këmbën e mbarë, sezonin e ri në Bundesligë. Në ndeshjen e parë të këtij edicioni, bavarezët nuk shkuan më shumë se një barazim 2-2 ndaj Hertës së Berlinit.
Takimi nisi mjaft mirë për ekipin e Kovaç, teksa Robert Levandovski shënoi golin e parë të sezonit, në minutën e 24-t. Por, në “Alianz Arena” ra heshtja, pas vetëm pak minutash.
Ibiseviç barazoi në minutën e 36-të, e vetëm 120 sekonda më pas, ishte Grujiç që shënoi për berlinezët, duke përmbysur gjithçka. Pjesa e parë u mbyll me këtë rezultat, por Bajerni kurrsesi nuk ishte dorëzuar.
Barazimi i rezultatit erdhi vetëm në minutën e 60-të, ku Levandovski shënoi golin e dytë personal dhe për ekipin, pas një penalltie të akorduar me VAR. Polaku nuk gaboi nga pika e bardhë, por deri në fund, nuk pati më gola të tjerë. Kështu, Bajerni dhe Herta ndajnë nga një pikë në ndeshjen e parë të Bundesligës.
