Dani Olmo ishte një nga lojtarët më të mirë në Europianin e 21-vjeçarëve, i cili u fitua nga Spanja.
Falë paraqitjeve të mira me kombëtaren e tij, mesfushori tërhoqi vëmendjen e skuadrave më të mëdha. Prej kohësh Milani ndjek me kujdes situatën e lojtarit të Dinamo Zagrebit, i cili pëlqehet shumë nga drejtuesit e kuqezinjve.
Por nuk janë vetëm italianët, pasi për 21-vjeçarin interes ka shfaqur edhe Bajern Mynihu, Barcelona, Liverpuli, dhe Junajtid, por transferimi tek këto dy të fundit është i pamundur për shkak se merkato në Angli është mbyllur.
Gjithsesi sipas asaj që shkruan “Mundo Deportivo”, Olmo është pranë transferimit te Ajaksi. Holandezët kanë kontaktuar drejtuesit e Dinamo Zagrebit, dhe kanë ofruar 22 milionë euro për të marrë shërbimet e spanjollit.
Gjithashtu në drejtim të kroatëve do të kalojnë edhe 40% të shumës, në rast se lojtari shitet nga Ajaksi. Edhe vetë mesfushorit do t’i pëlqente një kalim në Holandë, dhe tani pritet vetëm përgjigja nga klubi i tij aktual.
