UEFA nuk ka kursyer aspak klubin e Kamer Qakës, teksa ka dënuar ashpër episodet e dhunshme në sfidën kualifikuese të Ligës së Europës mes Universitatea Kraiova dhe Honved.
Takimi u shoqërua gjatë gjithë kohës me incidente mes tifozëve, ndërsa mjaftoi një episod në minutat shtesë të ndeshjes, me protagonist Qakën që gjithçka të shpërthente.
Mesfushori i Kombëtares pas një përplasje në zonë, shtyu në mënyrë të dhunshme kundërshtarin.
Në këtë moment nga tribunat fluturuan çakmakë dhe fishekzjarrë, të cilët goditën gjyqtarin kryesor.
Ndeshja u ndërpre për rreth 30 minuta, megjithatë gjyqtari vendosi ta vazhdojë, teksa nga pika e bardhë e penalltisë u kualifikua ekipi i Qakës, Kraiova.
Kështu, pas këtyre episodeve UEFA ka vendosur që tre ndeshjet e ardhshme Universitatea Kraiova t’i luajë pa praninë e tifozëve, ndërsa duhet të paguajë edhe një gjobë financiare prej 60 mijë eurosh.
