Luis Suarez në një intervistë për “Sport890” ndër të tjera u pyet dhe për çështjen Neymar, ky i fundit përflitet për një rikthim tek Barcelona.
Urugaiani thekson se Neymarit i duhet lënë kohë për të shqyrtuar të ardhmen.
Luis Suarez dhe Neymar, bashkë me Lionel Messin, kishin formuar një partneritet të frikshëm në fazën e sulmit për klubin katalanas mes viteve 2014-2017, para se braziliani të largohej në PSG.
Megjithatë 27 vjeçari tani është i vendosur për t’u larguar nga parisienët, por Suarezi i ka bërë thirrje që të qëndrojë i qetë pasi ky është një moment i vështirë për të.
“E di që është kohë e vështirë për Neymarin. Ai duhet të qëndrojë i vetëm me njerëzit e tij për të vendosur se çfarë dëshiron”, ka thënë Suarezi.
Neymari ende nuk ka bërë asnjë paraqitje për Paris Saint-Germainin në sezonin e ri të Ligue 1, por saga e transferimit të tij pritet të vazhdojë deri të hënën në 23:59 kur mbyllet merkato.
Duke folur pas fitores me rezultat 2:0 kundër Metz të premten, drejtori sportiv i PSG-së Leonardo e theksoi edhe një herë gatishmërinë e PSG-së për ta lejuar largimin e Neymarit, mirëpo shtoi se i takon Barcelonës të bëjë një ofertë të mirë para se të mbyllet merkato.
