Çmimet e biletave në ndeshjet europiane, ka qenë një nga problemet më të mëdha për tifozët që i ndjekin skuadrat e tyre në transferta.
Tifozë të shumtë kanë bërë disa ankesa, pasi pavarësisht kostove të udhëtimit, atyre iu duhet të paguajnë edhe një çmim të lartë për biletën e ndeshjes.
Tashmë UEFA ka marrë një vendim për sa i përket ankesave të shumta dhe kanë vendosur se në Ligën e Kampionëve, asnjë biletë nuk do të kushtojë më shumë se 70 euro, për tifozët miq.
Ndërsa në Europa Ligë, bileta më e shtrenjtë për tifozët miq do të jetë 45 euro.
Për këtë ka folur edhe presidenti Aleksandër Ceferin i cili u shpreh: “Tifozët i japin jetë lojës së futbollit. Ata që ndjekin ekipet e tyre në ndeshjet që zhvillojnë në transfertë, duhet të marrin bileta me një çmim të arsyeshëm, duke pasur parasysh edhe koston që ata kanë shpenzuar për udhëtimin”, theksoi 51-vjeçari.