Pas transferimit në Amerikë, Ansi Agolli vazhdon të shënojë për ekipin e tij, Nju Jork Kozmos. Së fundmi, ishkapiteni i Kombëtares ka zhvilluar finalen e kampionatit NPSL, përballë Majemit.
Kundërshtarët e Agollit shënuan dy herë shumë shpejt në minutat e para, por në minutën e 30-të, ishte pikërisht shqiptari që ngushtoi shifrat. Në një faull në krahun e djathtë, Agolli erdhi posaçërisht nga pozicioni i tij në të majtën e mbrojtjes për të shfrytëzuar këmbën e tij të majtë. Ai harkoi drejt portës një top që nuk pësoi asnjë devijim dhe më tej përfundoi në rrjetë. Për mbrojtësin kuqezi ky ishte goli i tretë në thuajse një muaj, ndërkohë që një shifër të tillë golash, Agolli me Karabak e ka shënuar për nëntë vite në kampionatin azer.
Aktualisht, mbrojtësi kuqezi po e shijon më së shumti eksperiencën që ka në kampionatin amerikan, teksa gjendet më shumë pranë portës kundërshtare. Jo vetëm kaq, por edhe në deklaratat e trajnerit të skuadrës së tij, Agolli është veçuar me cilësi prej lideri, që ka marrë përsipër përgjegjësi.
Ish-mbrojtësi i Kombëtares po përjeton një rini të dytë dhe formë të mirë në Amerikë, teksa ka udhëhequr skuadrën në 3 ndeshjet e fundit me gola spektakolarë nga jashtë zone. Gjithsesi, Majemi e fitoi 3-1 ndeshjen dhe ekipi i shqiptarit duhej të kënaqej me vendin e dytë në këtë finale të humbur.
