Skandali i rëndë që përfshiu futbollin belg ku u vërtetua se klubi i Meshelen kishte trukuar ndeshje, bëri që Liga e Futbollit të ndryshojë rregulloret e saj.
Për shkak të një paqartësie mbi afatet në rregullore, klubi u lejua që të qëndronte përsëri në elitën e futbollit belg, edhe pse të gjitha klubet e tjera ishin kundër një situate të tillë.
Në këto rrethana, Liga Profesioniste në Belgjikë është mbledhur dhe ka ndryshuar rregulloren sa i përket ngjarjeve të tilla.
“Një gjë e tillë nuk do të ndodhë më”, premtoi shefi ekzekutiv i Ligës, Pierr Fransua.
Sipas normës së re, çdo klub i cili vërtetohet se është përfshirë në manipulimin e qoftë edhe një ndeshje, dënohet direkt me rënien nga kategoria, si dhe do të marrë një gjobë të rëndë financiare duke i hequr një pjesë të madhe të të ardhurave nga e drejta televizive për sezonin.
“Do të jetë gjithmonë e mundur të aplikohen rregulla të tilla. Do të monitorohet çdo sanksion i mundshëm pasi ende nuk e kuptojmë se pse Meshelen nuk mund të bjerë nga kategoria”, tha Fransua.