Dëmtimet mesa duket do jenë problemi kryesor për Real Madridin në sezonin e ri që sapo ka nisur.
Që në fillim të sezonit teknikut Zidan i duhej të përballej me një numër të lartë dëmtimesh, që e detyruan të luajë me të gjithë lojtarët që kishte në skuadër një sezon më parë, edhe pse bënë shumë afrime në merkaton e verës.
Ditën e sotme trajneri francez është vënë në dijeni se një lojtar tjetër i madrilenëve ka pësuar dëmtim gjatë grumbullimit me kombëtaren e tij. Bëhet fjalë për Luka Joviç, i cili u transferua këtë verë në Spanjë, nga Aintraht Frankfurti.
Sulmuesi 21-vjeçar ishte grumbulluar me Serbinë për ndeshjet kualifikuese të Euro2020, por grumbullimi nuk shkoi në mënyrën më të mirë të mundshme. Lojtari u aktivizua ditën e djeshme përballë Portugalisë në minutën e 87’ të ndeshjes dhe Federata Serbe e Futbollit, ditën e sotme ka njoftuar klubin spanjoll se sulmuesi ka pësuar një dëmtim.
Joviç është larguar menjëherë nga grumbullimi me kombëtaren, teksa ka udhëtuar drejt Spanjës për vizita më të detajuara dhe për të kuptuar shkallën e dëmtimit.
