José Mourinho vazhdon të jetë pa një ekip, por mbetet protagonist në studiot televizive. Opinioni i tij në “Sky Sport” pas humjes 2-0 të Manchester ndaj West Hamit, ka ngjallur interesin e tifozëve të “Djajve të Kuq”. “The Special One” e pranoi se shkarkimi i tij nga detyra e trajnerit të United nuk ishte befasi.
“U shkarkova dhe me siguri e meritoja të shkarkohesha nga puna, sepse isha përgjegjës si trajner i skuadrës. Realiteti i trishtuar është se tani ata janë më keq se më parë. Kjo skuadër, për mua, është më e dobët se ajo e sezonit të kaluar”.
Manchester United ka grumbulluar 10 pikë më pak se Liverpooli vetëm pas 6 javëve të para, një diferencë e ndjeshme që nuk e bën të lumtur trajnerin luzitan.
“Për mua kjo është e trishtueshme. Ndoshta njerëzit mendojnë se unë jam duke e shijuar situatën, por nuk po e shijoj fare.”
E ardhmja, sipas Mourinhos, nuk do të ofrojë optimizëm:
“Ata me të vërtetë do të jenë në telashe jo vetëm sepse do të mbeten jashtë katër vendeve të para, por potencialisht nuk do të mund të renditen as në 6-shen më të mirë”.
Kur u pyet për problemet e Manchester United, ai preferoi t’i shmangej përgjigjes, për konflikt interesi.
“Nuk jam personi i duhur për t’iu përgjigjur kësaj pyetjeje. Eshtë e vështirë për mua. Kam qenë atje për dy sezone dhe munda të ndieja shumë gjëra pozitive…”
