Komisioni i Disiplinës, pranë Federatës Italiane të Futbollit, ka dhënë vendimet për sa i përket problemeve që ndodhën në ndeshjet e ditës së martë dhe të mërkurë.
Karlo Ançeloti nuk do të jetë në stolin e Napolit, për ndeshjen e fundjavës që të kaltrit do të luajnë ndaj Romës, në fushën e këtyre të fundit. Ky dënim vjen për shkak të protestave të trajnerit italian, në fundin e ndeshjes që Napoli barazoi 2-2 me Atalantën.
Dënimit nuk i ka shpëtuar as Interi, të cilët janë dënuar me një gjobë prej 5.000 eurosh. Kjo vjen si pasojë e koreve fyese dhe kërcënuese nga tifozët zikaltër ndaj Mario Balotelit, i cili në të kaluarën ka qenë pjesë e këtij ekipi.
Ndërkohë janë dënuar me nga një ndeshje pezullim për shkak të kartonëve, Kasata, Fazio, Nkulu, Rabiot, Taksidhis, De Run, Luka Pelegrin dhe Pecela.
