Disa orë përpara ndeshjes kualifikuese mes Kosovës dhe Malit të Zi, drejtuesit e të dyja federatave bënë homazhe te varri i ish-Presidentit të Federatës së Futbollit të Kosovës, legjendarit Fadil Vokrri, i cili ndërroi jetë në qershor 2018.
Te ata që vendosën lule aty ku prehet ish-legjenda e futbollit kosovar nën ish-Jugosllavi, por dhe më pas ku si zyrtar mundësoi anëtarësimin e Kosovës në UEFA e FIFA, ishte dhe Presidenti i Federatës së Futbollit të Malit të Zi, ish-futbollisti i njohur edhe i Milanit, Dejan Saviçeviç.
Njeriu që pasoi Vokrrin në detyrë, Agim Ademi,tha se “Dejan Savicevic ishte një mik i mirë i ish-presidentit tonë, Fadil Vokrri, kështu që në prag të ndeshjes zyrtare, ai erdhi me një dëshirë për të vizituar dhe bërë homazhe tek varri i legjendës”.
Saviçeviç theksoi se Vokrri u largua nga kjo botë herët, por se ai ishte sigurisht i lumtur për suksesin e arritur nga ekipi i Kosovës.
“Në ditën e varrimit, nuk pata mundësinë të vij sepse isha në Kongresin e FIFA-s, por sot shfrytëzova rastin të vij dhe të përkulem para varrit të Fadilit.
Ishte e vështirë për mua kur dëgjova që Fadil kishte vdekur.
Ai u largua shumë shpejt nga kjo botë, por kjo është jeta”, tha Saviçeviç, duke shtuar se ai kishte qenë një mik i mirë me Vokrrin që prej kohës së ushtrisë.
