Juventusi zbarkoi pasditen e djeshme në Moskë, por nga avioni i bardhezinjve nuk zbriti njeriu i fitores në derbin me Torinon.
Qendërmbrojtësi Matajs De Ligt ka dalë me një ndrydhje në kavilje nga ndeshja e fundit dhe ka qëndruar në shtëpi, ndërsa në vend të tij pritet debutimi në Champions i turkut Merih Demiral.
Tjetër ndryshim në mbrojtje mund të jetë ai mes Danilos dhe Kuadrados, ku bluza e titullarit pritet t’i takojë brazilianit. Në mesfushë do të luajnë tri të paprekshmit Matuidi, Pjaniç e Khedira, ndërsa në sulm, Ronaldon me shumë mundësi do ta mbështesë Higuaini.
Në rolin e fantazistit, Sarri mendon t’ia besojë “Rambo” Aron Ramsejt fanellën e titullarit, pasi uellsiani ka treguar se i ka lënë pas shqetësimet muskulore.