Derbi i solidaritetit. Klubi kampion i Partizanit po kërkon që sfidën e javës së 15-të me Tiranën, ta shfrytëzojë për t’i ardhur më tepër në ndihmë të prekurve nga tërmeti duke treguar dhe njëherë solidaritetin e botës së futbollit me ngjarjet tragjike që kanë përfshirë Shqipërinë në javët e fundit.
Klubi i kuq ka paraqitur një kërkesë në FSHF, që kjo sfidë të luhet në Air Albania Stadium dhe të ardhurat nga shitja e biletave të shkojnë për të prekurit e tërmetit. Klubi i kuq i ka kërkuar qeverisë së futbollit në Shqipëri, që për këtë shkak të ketë dhe një tolerim për pagesën e qirasë së stadiumit, në mënyrë që e gjithë shuma që do të grumbullohet nga biletat të shkojë për një solidaritet human.
Nisma e klubit të Partizanit, mund të jetë një mundësi e mirë që dhe vetë njerëzit dhe jo vetëm tifozët, të japin kontributin e tyre për tronditjen e tërmeteve të muajit nëntor duke mbushur kështu kapacitetin e stadiumit Air Albania.
Për momentin për këtë shkak se dhe Kategoria Superiore është shtyrë për një datë të pacaktuar, ndërkohë që nisma e filluar nga klubi kampion i Shqipërisë mund të pasohet dhe nga klube të tjera të Superiores që mund të shfrytëzojnë ndeshjet e kampionatit për të ofruar mbështetje financiare për të prekurit nga tërmeti në këto ditë të vështira për gjithë Shqipërinë, ku mbështetja nuk ka munguar as nga bota e futbollit.
