Siniša Mihajlović po kalon një nga momentet më të vështira në jetë. Ai po lufton me leukeminë dhe dje ka përfunduar ciklin e tretë të kurimit. Mjekët thonë se trajneri serb i Bolonjës ka dhënë sinjale të mira dhe se ai mund t’ia dalë ta fitojë betejën më të rëndësishme të jetës.
Një lajm i mirë për botën e fubtollit dhe për një njeri që i ka dhënë shumë këtij sporti. Por dje, pasi ka dalë nga spitali, 50-vjeçari nuk ka harruar të bëjë gjestin me tre gishta të çetnikëve serbë. Çetnik është term që vjen nga forcat serbe në Luftën e Parë Botërore nën komandën e Kosta Pećanac-it dhe nga forcat serbe në Luftën e Dytë Botërore nën komandën e Drazha Mihajlloviç-it. Por ky term, tanimë përçmues, përdoret për të identifikuar serbët nacionalistë të linjës së ashpër dhe disa forca paramilitare të udhëhequra nga krimineli famëkeq, Arkan.
Ky i fundit është i njohur për krimet dhe urrejtjen që kishte ndaj shqiptarëve. Sinisha Mihajloviç ka pranuar se e kishte pasur mik Arkanin (Željko Ražnatović) dhe ishin njohur bashkë që nga koha kur ai luante me Yllin e Kuq të Beogradit. Mihajloviç ka lindur në provincën kroate të Vukovarit dhe ka nënë kroate e baba serb.
Në rininë e tij ai është shquar për deklarata të forta nacionalistë, madje kur luante me Lacion u kërkoi tifozëve të vendosnin një banderolë në stadium në nder të Arkanit, pak ditë pasi ai u vra. Kujtojmë që Mihajloviç pati një përplasje fizike me Igli taren kur luante me Interin dhe kapiteni i Shqipërisë ishte pjesë e Lacios.