Sokol Cikalleshi di të “shënojë”, edhe jashtë fushe, madje edhe kur mungon në Kombëtare për një dëmtim.
I ftuar mbrëmjen e djeshme në “Procesi Sportiv”, bomberi kavajas iu përgjigj disa pyetjeve nga Alesia Bami, ku nuk ngurroi të thumbonte edhe ish-trajnerin e Shqipërisë, Kristian Panuçi, ndërsa në fund një puthje me Alesian.
BISEDA NË STUDIO
Ke pasur një sherr me Panuçin. Ai të la jashtë për një kontratë që po firmosje me klubin. Kishe ndopak faj ti vetë, apo e kishte vetëm ai?
Nëse do i kthehem kësaj situatë, fjalët ndoshta do ishin të tepërta. Mund të them se koha është treguesi më i mirë i të vërtetës. Besoj se sot çdo njeri mund ta mendojë se kush ishte me të drejtën dhe të vërtetën. Si Panuçi, edhe unë e kemi marrë përgjigjen. Dihet ku është Panuçi tashmë, dhe ku jam unë.
4 gola me Kombëtaren. Momenti më i mirë?
Është nder sa herë e vesh fanellën e Kombëtares. Për momentin ndihem shumë mirë, sepse po luaj dhe po shënoj. Jam sulmues dhe e kam ndihmuar ekipin. Ndihem mirë dhe uroj të vazhdoj kështu. Jam person që nuk kënaqem asnjëherë. Uroj të vazhdoj kështu.
Pse ke qarë kur ke parë intervistën e Andi Lilës që foli për ty?
Duke qenë se kemi një profesion, dhe origjinën nga Kavaja, shpesh ndihet konkurrenca midis njerëzve në një profesion. Kurse unë me Andin, kemi një rrugëtim të gjatë në aspektin profesional në futboll. Kemi kaluar shumë situata, dhe të kesh dashurinë si vëlla me sinqeritet, është shumë e bukur të duash, është edhe më e bukur të të duan. Është diçka e mrekullueshme.
Kur do e blesh Ferrarin?
Më zbërthyet totalisht. Unë dua që çdo ditë të ulem në të, ta kem buzëqeshjen në fytyrë. Dua t’i bëj llogaritë mirë para se ta blej.
(Më tej, Cikalleshi dhe Alesia Bami takohen të dy në mesin e studios, dhe e mbyllin me një puthje.)
