Ekipin e Vllaznisë ditën e sotme e drejtoi zëvendës trajneri, Safet Osja, në mungesë të Mirsad Jonuzit të pezulluar nga Disiplina.
Në intervistën për “Supersport” pas barazimit me Teutën, Osja i bëri komplimente Teutës, duke u shprehur se e vuri në vështirësi, ndërsa deklaroi se në pjesën e dytë shkodranët e rritën nivelin e lojës, edhe falë zëvendësimeve.
Çfarë i mungoi ekipit për fitoren sot?
Sonte Durrësi na vuri në vështirësi, edhe pjesa jonë e dytë erdhi në rritje. Mund të humbnim, por edhe mund të fitonim.
Po kthehet problem fakti që vuani para tifozëve?
Ndoshta edhe lojtarët nuk ishin në ditën e tyre, por edhe Teuta e luajti topin më mirë. Futbolli i pranon këto situata.
Ka ndonjë ngërç tjetër brenda ekipit?
Jo, nuk kemi asnjë ngërç.
Pse nuk e nisët me të njëjtin ritëm që në fillim?
Ia bëra komplimentet Durrësit që na vuri në vështirësi, por ne e rritëm lojën në pjesën e dytë. Edhe pse ndërrimet u bënë pak me vonesë, ato ndikuan në paraqitjen e ekipit.
U druajtët shumë para Teutës?
Ne kishim qejf për të marrë mesfushën, të ishim më agresivë, por ata e qarkulluan topin më mirë se ne. Gurishta luajti në mes të mesfushës, edhe pse është mbrojtës krahu, prej mungesës së Hygorit.
A mund të luante Bardulla në mesin e fushës?
Nuk e di sa e keni ndjekur Vllazninë, por kemi bërë rotacione pothuajse çdo ndeshje. Kanë luajtur pothuajse të gjithë lojtarët.