Eden Hazardit i mungonte thjesht një ndeshje me dimensionet e asaj kundër PSGsë për të konfirmuar momentin e mirë që po kalon me fanellën e Realit të Madridit.
Pasi bëri një paraqitje të shkëlqyer (por ende pa gol), belgu u detyrua që të largohej nga fusha e lojës pasi pati probleme në këmbën që u dëmtua në fillimin e sezonit. Zinedin Zidan e largoi nga fusha e lojës në minutën e 68-të dhe në fushë u fut Bejl, i cili sërish u fërshëllye nga tifozët.
Por kjo nuk ka shumë rëndësi në këto momente. Stoli u alarmua për dëmtimin e Hazardit, por ditën e djeshme pas ekzaminimeve të detajuara u konfirmua se ai ka marrë vetëm një goditje dhe do të mungojë vetëm 10 ditë.
Në këtë mënyrë, ai do të rikthehet më shpejt nga sa ishte parashikuar dhe Zinedin Zidan do ta ketë belgun në dispozicion.