Komisioni i Disiplinës në FSHF ka nisur këtë sezon duke aplikuar dënime të reja, madje duke shmangur ato kolektive.
Diçka e tillë, është konfirmuar për stadiumin “Loro Boriçi” të Shkodrës, pas disa incidenteve të vogla në ndeshjen e së hënës mes Vllaznisë dhe Bylisit. Disiplina ka mbyllur ditën e sotme, vetëm tribunën qëndrore të stadiumit, pra ato A, B dhe tribunën VIP.
Rasti i rrallë padyshim është mbyllja e tribunës VIP, e cila gjithmonë ka pasur persona të zgjedhur nga klubet, edhe në rastet kur janë aplikuar dënime kolektive për të gjithë stadiumin.
Mbyllja e “VIP”-ave në Shkodër erdhi pas momentit të golit të Bylisit, ku pasi anësori dhe kryesori nuk u morën vesh për akordimin e golit, kjo situatë acaroi tifozët, dhe një lumë sendesh dhe shishesh u hodhën në fushën e lojës, në drejtim të kryesorit Blerim Ziri, madje edhe nga tribuna VIP, siç duket edhe në pamjet më poshtë.
Pikërisht, tribunën VIP, A dhe B, Disiplina i ka mbyllur për dy ndeshje, një rast i rrallë ky për Superioren.
