Ish-kapiteni dhe ikona e Arsenalit në vitet ’90-‘2000 Patrik Vieira shihet si njëri prej kandidatëve të mundshëm për të marrë drejtimin e ‘’Topçinjve’’.
Drejtuesit e klubit londinez nuk i varin shpresat te zgjidhja e përkohshme Fredi Ljunberg, por tek ish-kampioni i botës dhe Europës Vieira. Mediat e huaja supozojnë se Vieira vlerësohet për karakterin dhe eksperiencën në fushën e trajnimit.
Arsenali po kalon një nga sezonet më zhgënjyese në historinë e tij dhe opsionet për të gjetur trajnerin e ri sa vijnë e po rrallohen.
Vieira luajti për 9 vite me Arsenalin (1996-2005) duke shkruar disa nga faqet më të ndritura në historinë e klubit anglez. Së bashku me Arsene Vengerin, francezi fitoi 3 kampionate (1998, 2002 dhe 2004) duke e transformuar Arsenalin e asaj kohë në njërën prej skuadrave më të fuqishme të Europës së bashku me Tierri Henrinë, Robert Piresin, Sol Kambëllin, Denis Bergkampin, etj. Vieira gjithashtu mbajti dhe shiritin e kapitenit. Ish-mesfushori fitoi trofe dhe në Itali me Juventuesin dhe Milanin.
Për sa i përket karrierës si trajner, ai ka drejtuar ekipin amerikan të Nju Jork Sitit, kurse tani komandon skuadrën franceze të Nisës.
