Endri Çekiç po kalon një moment fantastik te skuadra e Olimpja Ljubjanës në kampionatin slloven. Futbollisti pogradecar, është një nga më të dalluarit te klubi i tij, teksa shpeshherë ka qenë vendimtarë me supergolat e realizuar.
Për shkak të formës mjaft të mirë që po kalon, Çekiçi ka përfunduar në fokusin e klubeve italiane dhe spanjolle. Kjo bëhet e ditur nga media sllovene “24ur”, që bën me dije se ditët e fundit ka pasur oferta konkrete për shqiptari nga disa klube italiane dhe spanjolle. Bëhet fjalë për oferta të kënaqshme, që shkon deri në miliona euro, gjithsesi shuma e ofruar nuk është zbuluar ende.
Gjasat janë të mëdha, që Çekiçi në merkaton e janarit, ose në atë të verës, të bëjë hapin e madh në karrierë, duke u transferuar në një skuadër të një niveli më të lartë.
