Në një intervistë për revistën “Autosport”, piloti gjerman Sebastian Vettel ka folur në 360 gradë për sezonin që përfundoi dhe të ardhmen e tij. 4 herë kampioni i botës mbylli një tjetër sezon zhgënjyes me Ferrarin. “Edhe pse në teste ndjehesha komod me makinën e re, që pas garës së parë humbëm ekuilibrat dhe na u desh kohë për ta rigjetur atë”, tha Vettel.
Në lidhje me marrëdhënien që ka me shokun e skuadrës, Charles Leclerc, ai tha: “Solli diçka të re në këtë ambient edhe pse skuadra e këtij viti ishte ndryshe nga ajo e vitit të kaluar. Shpresoj që në 2020-ën të jemi së bashku më kompetitivë”.
Duke folur për të ardhmen, piloti gjerman tha: “E dua atë që bëj dhe jam ambicioz. Dua të fitoj diçka me këtë makinë dhe kjo më motivon. Dua t’i tregoj vetes se jam i aftë të arrij këtë objektiv. Dua t’u tregoj të gjithëve se mund t’ia dalim të fitojmë me Ferrarin, më pas të shohim për të ardhmen”.