Portieri i Kombëtares shqiptare, Thomas Strakosha, është duke kaluar një moment mjaft të mirë te skuadra e Lacios, teksa shpeshherë ka qenë vendimtar me pritjet e tij. Gardiani kuqezi do të ketë ditën e nesër një provë të vështirë përballë yjeve të Juventusit, teksa do të tentojë të bëjë një tjetër paraqitje fantastike.
Strakosha së fundmi ka marrë një tjetër vlerësim nga një figurë e njohur e portës në Itali. Bëhet fjalë për Luka Markexhanin, i cili është aktivizuar për 10 sezone me fanellën e Lacios.
Në një mbrëmje dedikuar legjendës italiane Dino Zof, Markexhani nuk i ka kursyer elozhet për portierin shqiptar, teksa u shpreh:
“Strakosha është i ri dhe që bën pritje të mira. Edhe më momentet më të rëndësishme të ndeshjes, unë nuk e kuptoj pse duhet të ketë dyshime në lidhje me të. Unë nga ai do të kërkoja vetëm pak më shumë prezencë në fushë pas 3 vitesh si titullar. Ndonjëherë pesha e portierit është e madhe duhet të ndihet edhe në lojë.
Zoff tha pak më parë ka thënë diçka inteligjente. Nëse ai do të ishte portieri i Interit, do të kishte të njëjtat vlerësime si Handanovic. Kur është e rëndësishme të bësh diçka të rëndësishme, një pritje të bukur dhe të vështirë, Strakosha është gjithmonë aty duke e bërë. Edhe unë mendoj si ai”.
