Xhenoa po kalon një periudhë shumë të vështirë në kampionat, teksa pas 17 ndeshje të zhvilluara renditen në vendin e fundit me vetëm 11 pikë dhe rrezikojnë rënien në Serie B.
Për këtë arsye drejtuesit e klubit kanë vendosur të ndërhyjnë në merkato, për të afruar emra të rëndësishëm në ekip në mënyrë që të sigurojnë mbijetesën.
Pasi morën në ekip, portierin Perin, dhe mesfushorin Valon Behrami, skuadra italiane ka zyrtarizuar një tjetër futbollist ditën e sotme. Nëpërmjet faqes zyrtare, Xhenoa njofton se ka transferuar sulmuesin e Bolonjës, Matia Destro.
Ky i fundit nuk kishte gjetur shumë minuta këtë sezon në ekipin e tij, dhe për këtë arsye vendosi të largohet. Destro i ka të gjitha mundësitë për të bërë mirë te Xhenoa, pasi më parë ka luajtur për skuadra të mëdha siç janë Milani dhe Roma.
