Piloti monogask Charles Leclerc, gjatë një eventi të zhvilluar sot në Birmingham, ka konfirmuar se gjatë ditëve të fundit ka patur disa polemika me drejtuesit e Ferrarit. Shkak është bërë një veprim aspak i pëlqyer i pilotit gjatë pushimeve.
Gjatë një eventi në Dubai, pas përfundimit të sezonit të kaluar, piloti 22-vjeçar monogask është hedhur me parashutë, pa njoftuar Ferrarin. Një disiplinë e rrezikshme, që mund të hidhte në erë të gjithë investimin që “kokëkuqja” ka bërë tek ky pilot, të cilit i rinovoi edhe kontratën.
“Nëse unë kam ndërmend të bëj diçka jashtë programit duhet të njoftoj më parë skuadrën, për të marrë leje. Në rastin e hedhjes me parashutë nuk i njoftova. Kur ata e morën vesh u inatosën shumë, por ju garantova se kjo gjë nuk do të përsëritet më. Hedhja me parashutë ishte fantastike, por nuk do ta përsëris më këtë gabim”, tha Leclerc.
