Partizani dëshiron që mbrojtësi i krahut të djathtë të Feronikelit Përparim Islami të vishet “i kuq” për vitin 2020.
Lajmin e mëson “Gazeta Sheshi”, e cila tregon se drejtuesit e kampionëve të Shqipërisë i kanë bërë ofertë të mirë 26-vjeçarit që luan për kampionët në fuqi të Kosovës. Por, operacioni për transferimin e tij nga Kosova në Shqipëri nuk është i lehtë.
Mundësitë e zëvendësimit të lojtarëve të larguar gjatë merkatos së janarit janë të pakta dhe Feronikeli do të humbiste një element kyç nëse do të miratonte shitjen e Islamit. Nga ana tjetër, ai ka dhe 6 muaj kontratë me “Tigrat e Zi”.
Përparim Islami është njëri prej lojtarëve më të mirë të kampionatit të Kosovës. Ai u përzgjodh në “Formacionin më të mirë të 2019” ku fitoi dopietën me Feronikelin (kampionat dhe kupë).
