Bashkëshortja dhe menaxherja e Mauro Ikardi Uanda Nara nuk siguron se sulmuesi i huazuar te PSG-ja do të luajë më tej me kampionët francezë.
Për “Gazzetta dello Sport”, 33-vjeçarja tregon se e ardhmja e 26-vjeçarit nuk është e sigurtë në Francë dhe duhet të pritur më tej se cili do të jetë vendimi i tyre dhe klubit.
“ Është vendimi i tij, asgjë nuk është e sigurtë akoma. Për mua, që udhëtoj ndërmjet Parisit, Milanos dhe Romës është e lehtë për të thënë, por jo për të bërë. Ai po punon shumë mirë në Francë dhe jam e lumtur për këtë gjë, për më tepër kemi gjetur miq të rinj”, deklaroi Uanda.
Ikardi u huazua këtë sezon te PSG-ja pas mosmarrëveshjeve me Interin. Argjentinasi do të qëndrojë në Paris deri në qershor të 2020 dhe drejtuesit e PSG-së mund ta blejnë gjatë merkatos verore nëse Ikardi vazhdon të paraqitet në mënyrë të kënaqshme. Kthimi te Interi në verë duket i pamundur pasi ishte trajneri Antonio Konte që nuk i dha hapësirë në formacionin titullar.