Kukësi shiti dje afërsisht 7600 bileta dhe, sipas llogarive paraprake, mendohet të ketë arkëtuar rreth 55-60 milionë lekë të vjetër. Një shifër e konsiderueshme për një klub që ka investuar shumë edhe këtë sezon dhe pjesën dërrmuese të ndeshjeve pritëse i luan me shumë pak tifozë, për shkak se stadiumi i Kukësit është në rikonstruksion.
Ndërkohë, burime pranë FSHFsë bëjnë me dije se marrëveshjet mes klubeve që zhvillojnë ndeshjet në “Air Albania” kanë një kleçkë interesante. Kur shuma nga shitja e biletave e kalon vlerën e 40 milionë lekëve të vjetër, atëherë FSHF ka të drejtë të marrë 25 për qind të shumës.
Pra, fillimisht u tha që në këtë stadium do të luhen ndeshjet me çmime të ngjashme me ato të stadiumeve të tjera, më pas u sanksionua shuma prej 9 milionë lekësh dhe tani FSHF mund të marrë deri në 15 milionë lekë të vjetër (ose edhe më tepër, pasi varet nga shuma e arkëtuar), duke i rënduar jo pak klubet, që i shohin këto ndeshje si të vetmet burim të ardhurash.
