Eric Cantona, legjendës franceze të Mançester Junajtid, i cili ëndërronte dhe është vetofruar që një ditë të drejtojë skuadrën nga stoli, i ka ardhur një ofertë nga “Djajtë e kuq”, por jo që të jetë trajneri i tyre.
Sipas “Mirror”, atij i është ofruar një rol ambasadori, duke iu bashkuar edhe Brajan Robsonit dhe Denis Iruinit, dy ikona të tjera të klubit, të cilët punojnë aktualisht pranë klubit në këtë kapacitet. 53-vjeçari, i cili shënoi 82 gola në 5 vitet që luajti në “Teatrin e Ëndrrave”, duke fituar katër tituj kampion, dy Kupa FA dhe tre Superkupa Anglie, do të mirëpritej nga tifozët.
Punësimi i tij në “Old Trafford” konfirmon tendencën e hierarkisë së Junajtid për të afruar pranë klubit ikonat. Kantona, i cili pas futbollit ka nisur edhe profesionin e aktorit, ka qenë gjithnjë në kontakt me “Djajtë” gjatë viteve të fundit.
