Klimë gjithmonë e më shumë e tensionuar në futbollin italian! Një farë “të gjithë kundër të gjithëve” që po formohet dhe fortifikohet… Nga një anë Juventusi & Co, duke qenë se presidenti Agnelli kërkoi shtyrjen e ndeshjes ndaj Interit për në datën 13 maj. Përkrah bardhezinjve Udinese që prej ditësh po bindte drejtuesit e Ligës për të shtyrë ndeshjen ndaj Fiorentina.
I janë bashkuar Juventusit dhe Udineses edhe drejtuesit e Milanit (Gazidis nuk donte që kuqezinjtë të luanin në fundjavë ndaj Genoas dhe më pas të mërkurën të zbrisnin në fushë ndaj Juventusit të shlodhur në fundjavë) dhe Genoas.
Presidenti i Brescias, Massimo Cellino, është bërë palë me Interin, pasi sipas tij lufta për mbijetesë manipulohet dhe falsifikohet në këtë formë me shtyrjen e disa ndeshjeve. Një luftë që vlen 30 mln euro dhe që duke parë se disa ekipe luajnë ndeshjet e tyre në fund më shumë se të tjerët, mund të kenë avantazhe. i shtohet listës së revoltës edhe Fiorentina, e bezdisur që shkoi në Udine dhe më pas vetëm 5 orë nga ndeshja e kampionatit, mori lajmin se do të shtyhet.
Lufta e radhës është Atalanta-Lazio, pasi bergamaskët do të kërkojnë që ndeshjen e tyre ta luajnë të premten dhe jo të shtunën, për të pasur 24 orë më shumë për të përgatitur Valencia-Atalanta në Champions League. Zgjidhje që nuk i pëlqen Lazios, aq sa Lotito ka bërtitur: “Nuk më plas fare se çfarë kalendari kanë ata!”… Praktikisht, gjithsekush sheh “kopshtin e tij”.
Një xhungël e quajtur Serie A, me alarmin e koronavirusit në rajone të caktuara, aty ku luhet pa tifozë dhe nuk luhet fare… dhe aty ku luhet rregullisht!
