Ai që do të shfaqet në startin e sezonit të ardhshëm mund të jetë një Milan shumë i ndryshëm nga i sotmi. Lajme të rëndësishme mund të vijnë si nga pikëpamja teknike, ashtu edhe nga grupi i lojtarëve. Gjithçka duhet të sillet rreth figurës së trajnerit të ri. Siç shpjegohet nga “La Gazzetta dello Sport”, Ivan Gazidis prej kohësh e ka identifikuar Rangnick si njeriun e përsosur për të realizuar një projekt, bazuar në rritjen e të rinjve. Vetë trajneri gjerman nuk e ka mbajtur sekret faktin që së shpejti mund të bashkohet me kuqezinjtë, ku do t’i garantohet një hapësirë e madhe manovruese.
Duke pritur të shohim se si do të zhvillohet situata në të vërtetë, shfaqet një detaj jo pa rëndësi: Rangnick do të ishte i gatshëm ta privonte veten nga Zlatan Ibrahimovic. Ai thuhet se ka disa dyshime në lidhje me cilësitë atletike të kampionit suedez, por edhe nga pikëpamja teknike, nuk do ta pëlqente faktin që Ibra shpesh lëviz në fushë sipas dëshirës, si “drejtor” i vërtetë. Prandaj, 38-vjeçari nuk është një nga ato elemente, që hyjnë në taktikat specifike të Rangnick dhe kjo mund të ketë një peshë vendimtare.
Në realitet, në shtëpinë e Milanit, të gjithë janë jashtëzakonisht të kënaqur me kontributin e dhënë nga Ibrahimovic, aq sa Boban dhe Maldini (i pari është një hap larg nga lamtumira dhe pozicioni i këtij të fundit është në dyshim) tashmë kanë filluar të punojnë për rinovimin. Kampioni suedez, muajt e fundit ka dhënë shumë, për sa i përket performancës, personalitetit dhe ndikimit te kuqezinjtë. Patjetër, kjo nuk ka kaluar pa u vënë re në klub.
Milani do të ishte gati të ecte përpara me Ibrahimovic, por nuk duket e nevojshme kjo gjë për Rangnick. Ndër të tjera, nuk përjashtohet që suedezi të vendosë të bëjë një hap prapa, sepse është i pakënaqur me situatën që ka lindur. Milani i ri mund të fillojë përsëri pa dy menaxherët, që e sollën atë përsëri në Milano, me të cilët tashmë kishte filluar të fliste për të ardhmen.
