Gazetat spanjolle dhe ato italiane vazhdojnë të insistojnë se drejtuesit e Napolit janë takuar me agjentin e sulmuesit të Real Madrid Luka Joviç. Ekipi Italian po mendon ta huazojë ose ta blejë përfundimisht serbin për shumën e 50 milionë eurove.
Negociatat me Viktor Osimhenin nuk janë mbyllur ende, dhe Joviç shikohet si një alternativë emergjente. Sulmuesi serb do ishte një opsion më i lirë dhe Real Madrid është gati ta largojë pas 2 golave dhe 2 asisteve në 25 ndeshje me madrilenët. Kampionët e La Ligas shpenzuan 60 milionë euro për ta marrë nga Frankfurti, por Joviç ka dështuar të lërë shenjën e tij në Madrid. Milan është favoriti kryesor për ta marrë sulmuesin serb në skuadër, pasi tek kuqezinjtë do ribashkohej me ish-shokun e tij tek Frankfurti, Ante Rebiç. Gjithsesi “AS”, “El Mundo Deportivo” dhe “Corriere Dello Sport” zbulojnë se drejtuesit e Napolit janë takuar me agjentin Fali Ramadani, për të diskutuar për situatën e Luka Joviç.
Ramadani e njeh Napolin mirë, pasi përfaqëson dy lojtarë të kësaj skuadre, Nikola Maksimoviçin dhe Kalidu Kulibalin. Leiçester Siti dhe Çelsi gjithashtu po monitorojnë situatën e Luka Joviç, kartoni i të cilit kushton diku tek 50 milionë euro.