Trajneri i Interit, Antonio Konte pretendon se klubet e tjera kanë avantazh përsa i përket fazës me elimim direkt në Europa Ligë. “Ato kanë pasur më shumë kohë për tu rikuperuar”, tha Konte.
Trajneri i Interit foli pas fitores 2-0 ndaj Napolit dhe tregoi se skuadra duhet të fokusohet në ndeshjen e fundit në Seria A kundër Atalantës. “Kjo ishte ndeshja e fundit e ciklit të ndeshjeve çdo tre ditë dhe përgjigjia atletike e ekipit duhet të na kënaq. Ne kemi luajtur 14 ndeshje në shumë pak kohë dhe kemi shpenzuar shumë energji. Ne duhet ta përfundojmë kampionatin mirë. Nuk e di sesa kohë kanë lojtarët pa u takuar me familjarët e tyre”. Inter përgatitet të përballet me Getafen në Europa Ligë me 5 gusht dhe Konte pretendon se klubet e tjera europiane kanë pasur avantazh. “Ne duhet të përgatitemi për Europa Ligën edhe pse ekipet e tjera kanë pasur më shumë kohë për tu rikuperuar.
Skuadrat e tjera europiane kanë pasur më shumë kohë për tu rikuperuar dhe pushuar dhe ta rifillojnë Europa Ligën me më shumë energji”, përfundoi Antonio Konte.
